| Sent survain ün chasa da cultura per minchün (Posta Ladina, 10 avuost 2006)
La Grotta da cultura fa festa
(anr/fh) Sonda chi vain ha lö a Sent la festa d'instà chi vain organisada da la società „Grotta da cultura“. Dürant l'occurrenza sunan differents interprets da la regiun ed ün inchant dess procurar pel chapital da partenza.
„Grotta da cultura es ün lö ingio chi vain fat cultura ed ingio cha nus provain da coordinar eir ün pa la cultura chi'd es in cumün.“ Uschea declera Gisep Stricker la funcziun da la nouva sporta culturala. Cun „nus“ manaja el la gruppa d'iniziants chi ha realisà il proget „Grotta da cultura“. Sün basa voluntaria han indigens e Sturnels elavurà ün concept per üna chasa da cultura illa quala pon gnir preschantadas exposiziuns, prelecziuns, concerts, seminaris e workshops.
Ün lö per minchün
Il nom „Grotta da cultura“ deriva dal local cha la nouva società ha tut a fit daspö ils 1. avuost. „La Grotta“ as rechatta pro l'hotel Rezia suotaint e d'eira plü bod tanter oter üna pizzeria ed üna bar. Trais parts appartegnan pro „La Grotta“. Üna servarà in avegnir sco local d'exposiziuns per indigens. „Minchün po expuoner che ch'el voul, saja quai püt a crusch, fotografias o robas intagliadas“, infuormescha Gisep Stricker. Cha l'idea saja da spordscher üna chasa culturala per tuots, per indigens e giasts, declera'l. „La Grotta nun es ün lö per l'elita, dimpersè per minchün“, intuna l'iniziant.
Ün lö d'inscunter
Üna seguonda part da La Grotta es reservada per exposiziuns cun ouvras d'artists plü cuntschaints. Quatter exposiziuns l'on dessan avair lö. Il terz local dvainta ün lö d'inscunter ingio chi's po baiver alch, leger o star da cumpagnia. Mincha prüm mardi dal mais es La Grotta averta per üna sairada da gös. Ils commembers da la società sun pronts da lavurar voluntariamaing per „far girar“ la bar illa Grotta. Gisep Stricker intuna cha la Grotta da cultura nu dess ni esser üna concurrenza pels restorants, ni pellas instituziuns culturalas chi existan fingià in cumün. „Collavuraziun e coordinaziun stan i'l center da nos interess“, garantischa el.
Ün lö da festa
In sonda organisescha la società cul president Gian Andri Albertini üna gronda festa da stà cun concerts dad interprets indigens ed üna band da l'Irlanda. Da la partida saran las gruppas Trubadurs, Jazzbazar, Paulin Nuotclà, la band giuvna Influenza, la First Guggiband e la Chapella Jünaiver. Il Trio Crastan e Risch Biert pisseran pella part classica dal program musical. Ils concerts han lö intuorn ed in chasa da scoula e düran adüna bundant 45 minuts. Dürant la davomezdi daja duos inchants ingio cha'l public ha l'occasiun da s'acquistar ouvras da differents artists, per exaimpel da Not Vital o da Jacques Guidon. Ils raps da l'inchant van illa chascha da la Grotta da cultura, sco chapital da partenza per pudair realisar il program e per pajar inavo ün credit a la Società da trafic.
La festa d'instà es per la Grotta da cultura üna pussibiltà per as preschantar a la populaziun. „Nus sperain impustüt cha'ls indigens tschüffan interess landervia e chi nüzzian lura eir la sporta culturala“, disch Gisep Stricker ed agiundscha: „Nus lain spordscher alch per tuots e sperain cha quel messadi haja success“.
|
Festa e passa 10'000 francs pella Grotta da cultura (Posta Ladina, 15 avuost 2006)
(anr/fh) In sonda passada ha gnü lö la festa da stà da la Grotta da cultura a Sent. A partir da las 11:00 fin tard aint pella not han bands e gruppas da musica da la regiun pisserà pel trategnimaint. Ils stils da musica d'eiran uschè differents sco il numerus public. Intant cha la Musica da Sent o „Ils Trubadurs“ han inchantà a la generaziun plü veglia, ha la band „Influenza“ preschantà rock rumantsch pella giuventüna. „JazzBazar“, „First Guggiband“ e „Chapella Jünaiver“ sun eir stats da la partida.
Ün ventin irlandais ha manà la gruppa „Ullean Pipers Club“ in chasa da scoula a Sent. Culla „ullean pipe“ - üna corna musa irlandaisa chi vain soflada sü cun ün boffet - e cun flötas da blech ha la gruppa da Schaffhausen pisserà per ün'atmosfera keltica in sala da gimnastica. La part classica dal program musical han cuntribui il „Trio Crastan-Petendi“ e Risch Biert. Ils concerts da benefiz han sunà gratuitamaing a favur da la Grotta da cultura. Ultra dals concerts han ils iniziants da la società organisà duos inchants. L'interess pellas fotografias, ils purtrets e las sculpturas da differents artists da la regiun e d'utrò es stat grond. Passa 10'000 francs sun splachats illa chascha da la società.
La festa d'inauguraziun da la Grotta da cultura ha lö als 14 d'october 2006.
|
