|
Christoph Schaub as cugnuoscha impustüt tras seis films cuntschaints STERNENBERG, HAPPY NEW YEAR e JEUNE HOMME. Quels films til han fat gnir cuntschaint eir sur ils cunfins oura.
Ma Christoph Schaub s'ha dedichà cun diversas ouvras eir als films documentaris. Ils temas da quels sun architectura. Cun «BIRD'S NEST - Herzog & de Meuron in China», ha'l trat l'attenziun internaziunala sün sai e sün si'ouvra. Eir films i'l intschess rumantsch ha'l fat divers, sco per exaimpel «Il project Vrin» e «Lieu, funcziun e furma», ün film sur da l'architectura da Peter Zumthor e Gion A. Caminada.
Christoph Schaub es nat dal 1958 a Turich e viva là cun sia famiglia. Üna collavuraziun cul cuntschaint produzent da films Marcel Hoehn (T&C Film) ha'l gnü per la prüma jada dal 1999 cul film «Die Reisen des Santiago Calatrava».
|
|
Da nos kino open air a Sent è'l stat fascinà be subit. El nun ha stuvü ponderar lönch sch'el vöglia esser da la partida. Da pudair far ün discuors cun Roger de Weck til paraiva massa interessant. Perquai è'l gnü e dal rest ha'l imprais a stimar il cumün da Sent sco lö fich simpatic per as remetter davo strapatschs plü gronds. Quai ha'l giodü per exaimpel davo avair pudü tour incunter il premi dal public da Locarno dal 2009 per seis film Giulias Verschwinden.
Uschè til vaina pudü artschaiver sü Sent. Ün hom ourdvart simpatic ed avert e fich ingaschà per il film. El ans ha quintà üna pruna detagls interessants da sia lavur. Las scenas dal film “Giulias Verschwinden” ha'l filmà cun duos cameras, quai ha'l fat per la prüma jada. Cun quai pussibiltescha el üna buna dinamica aint in dialogs sainza grondas acziuns. Eir schi düran fin nouv minuts, i nu dvaintan mai lungurus. Uschè po'l laschar grondas libertats als acturs sainza tils stuvair interrumper. Cun tagliar il film til stan a disposiziun duos variantas, üna cul raquint principal ed üna cun detagls insolits da las scenas. I's nomna quai “il material da bonus”. Per filmar las scenas cun Bruno Ganz e Corinna Harfouch ha'l dovrà be ün di! E per la scena aint il tram ha'l imprastà ün tram da la cità da Turich e til transportà aint il studio da film. Ün viadi spectacular per ün tram!
Ideas para'l d'avair amo üna pruna e be buonder spettaina sül prossem film!
|
