Daniel Schmid
da Cristina Gregori
-Carnaval a Cuoira, saira tard, s-chür ed ümid süllas vias. Jenatsch ed amis in ün schler chi fan festa, ün bavaretsch immez üna fuolla da glieud mascrada. Qua aintra il giuven schurnalist e mordriescha a Jenatsch!-

Quai es statta la prüma scena chi m’ha fat gnir la sgrischur. I’m paraiva cha Jenatsch e seis amis chavalgessan be davant il kino via cun lur fatschas rabgiantadas e plainas da vendetta. Eu sun sfuondrada amo ün zich plü fop aint illa pultruna per am proteger.
Quel film m’ha impreschiunà, impustüt il fat cha l’istorgia da Jenatsch d’eira intretscha-da cun ün’istorgia chi pudess capitar a tai ed a mai.
Passa desch ons plü tard invidaina a Daniel Schmid a nos Openair da kino a Sent. No lain muossar il film “Jenatsch” sülla taila gronda! E Daniel Schmid es rivà.

Daniel Schmid cul operatur Lüzzi Cadonau
La saira vaina stuvü mütschir aint il kino da Scuol. Nüglia nun esa stat cun giodair ils scumpigls suot tschêl avert.

Dadoura sfrattamaiva ün temporalatsch e sülla taila illa sala ha Jenatsch sfrattamà il portun dal chastè da Rietberg per mordriar a Pompejus Planta. Darcheu m’es gnüda la pel giallina.

Ils admiraturs da Daniel Schmid sun gnüts a lur quint. Cun suveranità ed in möd fich simpatic ha’l respus a tuot las dumondas - in üna sala plain stachida!
Seis stüdis ha’l fat a Berlin. El ha lavurà sco redschissur da films e dad operas. Seis films ils plü cuntschaints saran “Jenatsch” (1987), “Zwischensaison” (1992) e “Bere-sina” (1999). Immez la lavur vi dal film “Portovero” es Daniel Schmid gnü ferma-maing amalà. El es mort als 6 avuost dal 2006.
particularitats home